Apostol: Silotan ang Mapakyas Pag-file sa SALN

Gipahimangnoan sa Visayas Ombudsman ang tanang mga kawani sa gobyerno dinhi sa Central Visayas nga mahimo kining kapasakaan og kasong criminal ug administratiba kun mapakyas sila sa pagduso sa ilang Statement of Assets, Liabilities and Network (SALN).

Sumala pa ni Deputy Ombudsman for the Visayas Pelagio Apostol nga kutob ra sa Abril 30 ang gitakda sa kagamhanan alang sa pagsumiter sa SALN sa miaging tuig 2013.

Matud pa ni Apostol nga gihingusgan karon sa ilang buhatan ang pagsusi sa mga SALN sa mga kawani ug mga piniling opsiyal sa gobyerno. Kini aron masuta kun ang naasoy nga mga empleyado wala ba magbaton og mga mahalon nga kabtangan nga subra ra kaayo kadako itandi sa makobra niining sweldo nga maoy sagad indikasyon nga may anomaliya kini nga gihimo sa ilang pangimpleyo sa gobyerno.

Miingon si Apostol nga gikan sa bulan sa Enero hangtud ning bulan sa Abril ning tuiga, ubay-ubay na sa mga empleyado sa kagamhanan ang ilang napaubos sa lifestyle check ug kun may igong ebidensya, posibli kining kapasakaan og tukmang kaso.

Si Apostol nagkanayon nga ang mga kawani nga mapakyas sa pagduso sa ilang SALN hayan masilotan og 3 ka bulan nga pagkasuspenso alang sa kasong administratiba ug P5 mil nga multa o pagkabilanggo sulod sa 5 ka tuig sa kasong administratiba.

Ang Ombudsman mitumbok usab nga ang mga opisyal sa Local Government Unit nga napakyas sa pagpahimangno sa iyang
mga kawani sa pagduso sa ilang SALN posibli usab nga malakip sa mapahamtangan og silot.