Apostol: Opisyal nga Kawatan Angay Prisohon

Maglisud ang Pilipinas pag-uswag sama sa Hong Kong gawas lamang kun ang mga Filipino moabag sa gobyerno pagpapriso sa mga kawatan.

Mao kini ang pintok nga pamahayag ni Deputy Ombudsman for the Visayas nga si Pelagio Apostol sa mga tigbalita sa miaging semana.

Miingon siya nga dinhi sa Visayas, ilabi na sa Cebu, adunay mga magbabalaod nga kasamtangang ilang giimbistigahan kun tinuod ba ang mga proyekto niini nga gigastohan sa ilang Priority Development Assistance Fund (PDAF).

Wala hinuon siya motug-an kun pila sa siyam ka mga magbabalaod sa Sugbo ang nalambigit sa maong matang pangawat sa kwarta sa gobyerno. Apan iyang gipasalig nga kun makompleto lamang ang mga ebidensya batok sa mga akusado, alang kaniya kinahanglang prisohon kining mga tawhana aron makabaton og tagam.

Ang mga senador ug kongresista nga akusado sa PDAF kinahanglang kapamatud-an ang ilang sala pinaagi sa mga ebidensya ug angay sila nga prisohon.

Iyang gitug-an nga ang Hong Kong sama sa mga Filipino kaniadto hinungdan nga dugay nga misaka ang ekonomiya sa maong nasud ug gani mas nag-una pa niini ang Pilipinas kaniadto.

Apan dihang nakakat-on ang mga molupyo didto pagtug-an ngadto sa mga otoridad kutob sa masakpan nila nga mga opisyal sa gobyerno nga mounay ra pagsurambaw sa gobyerno pinaagi sa pagpangawat sa kwarta niini, nakakat-on og tagam ang mga opisyal kinsa nabilanggo gumikan sa pagka-kiriwan.

Miingon siya nga kining mga politiko may kauwaw usab kini ilabi na kun masakpan sila nga mangawat kay ila mang gibantayan ang ilang kridibilidad ilabi na nga may asawa sila ug mga anak.

Dili sila gusto nga maduhig sa kaulaw ang ilang pamilya sa ilang kakawatan nga unta kasagaran kanila may igo mang katigayonang personal.

Apan nasuta ni Apostol nga kun may aso, may kayo gyud o kun baniog na ang usa ka opisyal nga nangawat, usa kini ka matang sa aso nga nagpasabot nga may minaldito gyud nga gihimo ang usa ka opisyal.

Hinungdan nga giawhag niya ang tanan nga angay magmata ug bantayan ang matag opisyal sa kagamhanan aron nga ika-papriso dayon kini kun mangawat.

Dili gusto si Apostol sa mga tawo nga magpakahilom lang kay mao kini ang makapaunlod sa atong nasud ngadto sa pagka-uyamot.

Image Credit: theavscourier.journ.ph