Apostol: Dili Mahadlok sa mga Kawatan nga Opisyal

Kun ang tanang mga Filipino maghiusa lang sa pagbantay batok sa korapsyon, dili unta modaghan ang kawatan sa buhis sa katawhan, sumala pa ni Deputy Ombudsman for the Visayas Pelagio Apostol.

“Sa samang higayon, kun wala pa lang unta’y mga kawatan hayan nga mas umentado pa ang Pilipinas kay sa nasud sa Hong Kong karon,” dugang pa ni Apostol.

Sa AGIO Forum sa PIA ug DYMR gahapon sa buntag, Martes, gisaysay ni Apostol nga ang taga Hong Kong nag-antos usab kaniadto sa mga pangabuso sa ilang mga opisyal sa kagamhanan kinsa maoy kasagarang nagpasiugda og dagkong kawat sa buhis sa katawhan.

Apan dihang nakaamgo ang mga molupyo nga sila ra usab ang mahimong makaluluoy pag-abot sa adlaw, nakakat-on sila sa pagkahimong “whistle blower,” diin kutob sa masakpan nila nga mga opisyal sa gobyerno nga kawatan taralon dayon ngadto sa hukmanan hangtud nga ma-priso.

Ingon niini ang giawhag ni Apostol sa katawhang Filipino nga angay nga dili mahadlok ug labing magmaisugon batok sa mga kawatan nga opisyal.

Midugang siya nga kun magpabilin ang mga Filipino nga magpaka-buta-bungol sa pagbutyag sa ngadto sa mga otoridad bahin sa mga kawatan nga mga opisyal, walay umento ang kahimtang sa nasud ug magpadayon usab pagtambok ang mga kawatan.

Apan kun matag karon ug unya, may mapriso nga mga kawatan, mapugos paglikay sa pagpangawat ang naghunahuna pa unta niini kay mahadlok nga mapriso.

Naghinaot si Apostol nga unta makakat-on na ang mga Filipino sa pagka-whistle blower aron nga maundang na ang kakawatan sa ubang mga opisyal sa kagamhanan.

Image Credit: theavscourier.journ.ph