Ang Tahas sa Bag-ong Hepe sa City Legal Office

Ang pagpaninguha nga malibkas ang “freeze order” nga nagdumili sa kagamhanan sa dakbayan sa Sugbo nga makobra ang P124 milyones nga deposito gikan usa sa iyang mga depository banks maoy usa sa hatagan og pagtagad sa bag-ong hepe sa Cebu City Legal Office.

Si City Legal Officer Gerone Castillo gitahasan ni Mayor Michael Rama sa paghatag og igo nga pagtagad sa mga kaso nga naglambigit ang dakbayan sa Sugbo.

Bisan og adunay status quo order nga giluwatan sa Court of Appeals, apan ang kadagkoan sa Philippine Postal Savings Bank wala mopatuo og gipugngan nila ang dakbayan sa pagkobra sa maong kantidad nga deposito sa City Hall.

Ang pagpugong sa banko nga makobra ang maong kantidad sa deposito sa City Hall naggumikan sa garnishment order nga giluwatan sa Regional Trial Court (RTC), diin ang hukmanan gusto nga pugson pagkuha ang kwarta sa dakbayan aron ibayad sa pamilya nga Rallos.

Ang hukmanan mimando na nga pabayron ang dakbayan sa Sugbo sa kantidad nga P133 milyones sa yuta nga gipanag-iya sa mga  Rallos diha sa Barangay Sambag 2 nga gigamit isip public road.

Hatagan og dakung pagtagad ni Castillo ang mao nga isyu tungod kay ang dakbayan apektado sa pagpugong sa banko nga makobra ang dakung kantidad nga salapi.

Si Mayor Rama miinsistir gayud nga dili mobayad ang dakbayan sa Sugbo sa P133 milyones tungod kay nakakuha siya og  dukomento nga ang luna nga gihimong karsada gidonar na diay sa pamilya’ng Rallos ngadto sa dakbayan kaniadtong 1940.

Ang “convenio” kon kasabotan nga gipirmahan sa mga tag-iya sa yuta gipirmahan kini atubangan ni Huez (Judge) Benito Natividad sa Court of First Instance(CFI) nga karon gitawag na’g RTC.

Matud ni Rama nga si Castillo gitahasan g’yud niya nga panalipdan ang katungod ilabi na ang katigayonan sa dakbayan sa Sugbo.

Si Castillo miingon nga gusto unta siya nga mokuha og mga banggiitang abogado aron takus ang City Legal Office nga makig-atbang sa mga abogado sa ilang kontra sa mga kaso.