Ang mga Benepisyo sa Luy-a sa Panglawas

Ang Ginger o luy-a ang usa sa mga lamas nga kada adlaw natong gigamit aron malami ang atong pagkaon. Ang luy-a dili lamang makadugang sa kalamian sa pagkaon kon dili puno usab kini sa sustansya. Ang luy-a usa ka tropikal nga tanom nga orihinal nga mitubo sa Southeast Asia apan kaylap na nga makuha gikan sa mga grower sa tibuok kalibutan. Nagpabilin kini nga popular nga tambal sa balay alang sa nagsuka, gisakitan sa tiyan, ug uban pang mga sakit sa lawas.

Ang mga tawo kasagarang mogamit og presko o gibuwad nga luy-a sa pagluto, isip herbal tea, ug ang uban mokuha og ginger supplements alang sa mga benepisyo niini sa panglawas.

Naay daghan benepisyo nga makuha sa pagkaon o gluy-a o pag inom og ginger extact sama sa mga sumusunod:

Aduna kiniy gingerol – Ang gingerol mao ang nag-unang bioactive compound sa ginger. Kini adunay anti-inflammatory ug antioxidant nga mga epekto. Makatabang usab kini sa pagpakunhod sa oxidative stress, nga moresulta sa sobra nga gidaghanon sa mga free radicals sa lawas.

Makatambal sa pagka kasukaon, ilabina sa “morning sickness’ sa mga mabdos – Ang luya epektibo kaayo batok sa pagka kasukaon. Makatabang usab kini sa paghupay sa kasukaon ug pagsuka alang sa mga tawo nga nagpailalom sa pipila ka matang sa operasyon, ug kasukaon nga may kalabotan sa pagmabdos. Bisan tuod ang luy-a gikonsiderar nga luwas, importante nga mokonsulta gihapon sa imong doktor sa dili pa moinom og daghang luy-a labi na kon ikaw mabdos.

Makatabang sa pagpa-ubos sa timbang – Sumala sa mga pagtuon nga gihimo, ang luy-a adunay papel sa pag-ubos sa timbang. Ang abilidad sa luya sa pag-impluwensya sa pagkawala sa timbang may kalabutan sa pagtabang niini sa pagsunog sa mga kaloriya o pagpakunhod sa pagpanghubag.

Makaalibyo sa sakit nga dala sa osteoarthritis – Adunay usa ka literatura nga nagpakita nga ang mga tawo nga migamit og luy-a sa pagtambal sa ilang osteoarthritis nakasinati og pagkunhod sa kasakit nga ilang gibati ug pagkabaldado.

Makapaus-os sa asukar sa dugo ug makapamenos sa risgo sa diabetes – Ang luy-a adunay anti-diabetic property. Mahimo usab kining mopamenos sa pagdaghan sa hemoglobin A1c (HbA1c), usa ka timaan sa taas nga lebel sa asukal sa dugo.

Makatabang sa pagbatok sa impeksyon – Ang gingerol makatabang sa pagpaubos sa risgo sa mga impeksyon. Ang ginger extract makapugong sa pagtubo sa daghang klase sa bakterya.

Makamenos sa pagsakit sa pus-on kung giregla – Usa sa mga tradisyonal nga gamit sa luy-a mao ang paghupay sa kasakit nga naa sa dysmenorrhea (sakit sa pus-on panahon sa pagregla). Ang luy-a mas epektibo batok sa kasakit sa pagregla kung imnon kini sa pagsugod sa regla.

Ang luy-a puno sa mga sustansya ug bioactive compounds nga adunay daghang mga benepisyo alang sa lawas ug utok sa tawo. Gani giila kini nga usa ka superfood. (ND II Geraldine Mae S. Pausanon, RND)