Allowance sa mga Huwes, Paubsan

Ang mga opisyal sa dakbayan sa Sugbo nagplano nga makigtagbo sa mga huwes sa Regional Trial Court (RTC) ug justices sa Court of Appeals (CA) aron sila suknaon unsay buhaton nga gipakunhoran man ang ilang budget alang sa paghatag og binuwan nga allowance.

Matud ni Cebu City Administrator Jose Marie Poblete nga wala pa hinoon sila makadawat og kopya sa giaprobahan nga Appropriation Ordinance diin giibanan ang budget alang sa binuwan nga allowance sa mga huwes ug justices.

Ang mga konsehal sa dakbayan gidak-an ra kaayo sa gihatag nga allowance sa mga huwes ug justices nga kon pila ang ila nga “basic pay” gikan sa Supreme Court ingon usab niini ang kantidad nga ihatag sa City Hall nga allowance matag buwan.

Adunay mga huwes nga nagsweldo og kapin sa P40,000 ang matag buwan samtang ang mga justices moabot og kapin sa P50,000.

Bisan og giibanan sa City Council ang gisugyot nga budget ni Mayor Rama apan mahimong dagku gihapon ang ilang binuwan nga allowance nga mora moabot og P25,000.

Usa ka environmentalist-lawyer mihulagway sa mao nga paghatag sa dakbayan og dagku kaayo nga allowance sa mga huwes, justices ug mga fiskal nga usa ka pag-usik-usik lang sa salapi.

Matud ni Atty. Gloria Estenzo-Ramos nga ang mao nga dakung kantidad mahimo unta nga magamit sa mga proyekto nga kapahimuslan sa katawhan.