Alimpulos Milampornas sa Brgy. Sambag 2

Naguba ang mga atop sa pito ka classrooms sa Southwestern University (SWU) College of Education sa Barangay Sambag 2 dihang gilampornas ang mao nga dapit sa alimpus kaganinang buntag.

Samtang gilunopan usab ang ubay-ubay’ng mga dapit sa dakbayan sa Sugbo ug Mandaue diha nga mibunok ang nagbuntag nga kusog kaayo’ng ulan gikan pa kagabii tungod sa bagyo nga Mario.

Si Mayor Michael Rama abtik kaayo nga nakadeklarar nga walay klase sa tanang level sa mga public ug private schools sa dakbayan sa Sugbo. Ang sama nga deklarasyon gihimo usab sa ubang mga mayor sa mga dakbayan sa Metro Cebu.

Gimando usab ni Gobernador Hilario Davide III ang pagkanselar sa klase sa tanang mga dapit sa probinsya sa Sugbo aron ang mga tinun-an dili mahasol pag-adto nila sa mga tunghaan.

Daghang mga kawani sa lainlaing call centers sa IT Park ang wala dayon makapauli human sa ilang mga duty kay wala nay mga sakyanan nga mibiyahe tungod sa kahadlok sa mga baha nga miigo sa lainlaing karsada sa dakbayan.

Si Mayor Rama personal nga mihimo og inspection sa nagkalainlaing mga dapit sa dakbayan, ilabi na didto sa highway dapit sa eskena sa Kinasang-an nga taga tuhod ang gihabugon sa tubig.

Mga tawo nga nagpuyo kilid sa Kinalumsan River unahan sa CIT University mibiya sa ilang panimalay diha nga si Mayor Rama migamit og megaphone sa pag-awhag kanila nga biyaan ang maong dapit kay misuyla na ang tubig sa tampi.

Didto sa Mandaue, lawom usab kaayo ang tubig sa Barangay Subangdaku tungod sa pag-awas sa Mahiga Creek ingon man sa ubay-ubay pa nga mga dapit sa Mandaue nga gipangbahaan.

Wala kaayo’y mibiyahe nga mga PUJ sa Mandaue paingon sa dakbayan sa Sugbo kay nahadlok sila sa lawom nga tubig-baha diha sa Barangay Subangdaku, ang barangay nga nahimutang utlanan sa Sugbo ug Mandaue.

Didto sa Barangay Buot, bukid nga barangay habig sa dakbayan sa Toledo, usa ka balay ang naguba diha nga naligiran kini’g dako’ng bato samtang ang tag-iya nga si Fructuoso Bacayan ug ang iyang pamilya paingon na unta nga mokaon kaganinang buntag.

Matud ni Buot Barangay Captain Rosalina Daya Callino nga wala hinuo’y naunsa sa mga sakop sa pamilya ni Bacayan. Mga lumolupyo sa Barangay Buot wala makalugsong sa dakbayan sa Sugbo kagahapon kay dili sila makatabok sa kusog nga bul-og sa baha sa Mananga River.

Ang mga konsehal sa dakbayan sa Sugbo naghimo og special sesyon aron nga magahinan og salapi ang panginahanglan nga mapugngan ang sagunson nga pagbaha.