Alert System Sa Buhisan Dam Gimando

Alang sa kaluwasan sa 300 ka mga pamilya nga anaa namuyo sa danger zone kon dilikadong lugar ubos sa Buhisan Dam sa unom ka sitio sa Barangay Buhisan ning syudad, ilabina human sa pagdahili sa yuta sa pipila ka lugar niini ug sa pag-awas sa tubig sa dam, gimando sa mga opisyal sa dakbayan ug sa barangay ang pagbutang sa alert system.

Usa ka temporaryo ug manual nga warning system device nga ginamit ang usa ka oxygen tank ug puthaw nga maoy ibunal niini isip warning bell ang gamiton sa pagpahimangno sa mga katawhan sa palibot nga gikinahanglan na nilang mobakwit paingon sa temporaryong evacuation center.

Gihingusgan nilang Bise Mayor Edgardo Labella ug Konsehal Dave Tumulak ang pagbutang sa maong alert system nga dako ug ikatabang sa mga lumulopyo sa paghatag og warning panahon nga mobuswak ang tubig nga maoy mamahimo unyang hinungdan sa pagbaha.

Gibutyag ni Buhisan Brgy. Kapitan Ramil Rago, nga nagpahigayon na sila og konsultasyon sa mga apektadong pamilya gikan sa Sitio’s Eskwelahan, Dam, Lower Putie, Puso, Sandayong ug Taytayan.

Matod pa ni Rago nga, “Uyon ra nga mobalhin ang mga apektadong pamilya basta naay mabalhinan, ug aduna na tay nakita nga dapit nga posibleng kabalhinan nila diha sa boundary sa Barangay’s Buhisan ug Tisa; Nagbutang na pod ta ug mga mobantay sa dam aron moatiman sa manual nga alert system.”

Dugang pa niini nga himoong temporaryong evacuation center ang Barangay Buhisan Sports Complex ug ang Buhisan Elementary School kung ugaling adunay mahitabong pagbaha ug pagdahili sa yuta.

Samtang giasoy ni Charmaine Rodriguez, ang Public Affairs Manager sa Metropolitan Cebu Water District kon MCWD nga maoy nagdumala sa Buhisan Dam nga lig-on pa ang dam nga desenyo nga moluntad og dugay kini bisan pa man og 101 na ka tuig ang maong dam niadtong Pebrero 13 ning tuiga.

“The dam is very much stable, based from the assessment of our Engineers and Consultants,” matod pa ni Rodriguez kinsa mibutyag usab nga ang kadagkuan sa MCWD makigtagbo sa mga opisyales sa kagamhanan sa dakbayan sa Sugbo.

Samtang sa pagsuwat ning balita gitun-an pa sa dakbayan  pinaagi sa Division for the Welfare of the Urban Poor kon DWUP ang paglantaw sa posibleng relocation site sa mga apektadong residente. (Ni: Greggy Jiggs P. Senados, PIO Staff)