Alcala Mitunol og mga Proyekto sa Bohol

Gitunol ni Agriculture Secretary Proceso Alcala sa iyang pagbisita sa Bohol niadtong Marso 22 ang kapin sa P90 ka milyon nga kantidad sa mga agriculture projects ug farm implements ngadto sa mga mayor, mag-uuma ug mangingisda.

Ang maong assistance package maoy kabahin sa rehabilitation assistance sa Department of Agriculture’s (DA) sa lalawigan sa Bohol nga grabeng naapektohan sa 7.2-magnitude nga linog niadtong Oktubre 15 sa miaging tuig.

Sa paningkamot sa paghiuli sa mga nangagubang seaweed farms ug aquaculture projects, si Alcala mihatag sa kinatibuk-ang P32 ka milyon alang sa recovery efforts sa nagkalain-laing proyekto sa pangisda.

Migahin usab ang DA og P5 milyon alang sa construction sa farm-to-market road sa Cogon Norte.

Misaad usab si Alcala nga mohatag og galingan sa mais sa mosunod nga upat ka buwan kun magtanom og dugang kaumahan sa mais ang mga mag-uuma.

Dugang niini, misaad usab ang kalihim sa DA sa paghatag og tractora alang sa mga tigtanom og mais kun ilang mapalapdan ang ilang kaumahan niini ngadto sa di mo-ubos sa 500 ektarya.

Atol usab sa maong pagduaw sa lalawigan ni Alcala, gipirmahan nila ni Gob. Edgardo Chato ang Memorandum of Agreement nga nagmugna sa pagpatuman sa Philippine Rural Development Program (PRDP) sa lalawigan sa Bohol.

Ang PRDP unom ka tuig nga programa nga gimugna aron pag-establisar sa inclusive ug market oriented nga sektor sa agri-fishery nga sektor , sumala ni Alcala.

Ang ubang proyekto nga gipang-apud-apod sa maong pagbisita sa kalihim naglakip sa pagpanghatag sa kapin sa 300 coconut salt fertilizers, 300 coconut seedlings, 48 kanding, 10 kabaw, 10 baka, 10 paresan sa kanding ug lima ka paresan sa baboy.

Gisusi usab ni Alcala ang Manga Fish Port sa syudad sa Tagbilaran alang sa posibleng rehabilitasyon ug upgrading niini. Nakita sa kalihim ang maong fish port isip potensyal nga fishing hub ug merkado alang sa mga lokal nga mangingisda ug turista.

Gisugyot gani ni Alcala ang paggalam gamit sa fish cages sa mga taas nga kalidad sa isda sama sa pompano ug lapu-lapu duol sa palibot sa maong fish port ug ibaligya sa mga turistang mobisita sa Bohol.

Image Credit: www.philippinestodayus.com