Adunay Senior nga Wala Kadawat?

Duna g’yuy mga senior citizens nga wala makakobra sa ilang tag P2,000 nga cash assistance gikan sa Cebu City government tungod kay ang ilang mga ngalan nawagtang sa lista nga gipreparar sa Office of Senior Citizens Affairs.

Ang mao nga mga senior citizens nga nakadawat pa gani sa gipanghatag nga tag P4,000 kaniadtong Marso 25, gibati og kahibulong kon ngano nga nahanaw na ang ilang mga ngalan gikan sa listahan nga maoy sumbanan kinsa ang makadawat.

Si Rolando “Dodong” Llaguno, pangulo sa Office of Senior Citizens Affairs (OSCA) sa dakbayan sa Sugbo, miawhag lang sa maong mga senior citizens sa pag-adto sa iyang opisina sa City Hall karong Lunes aron mahimoan og sulbad ang problema.

Giangkon ni Llaguno nga duna sila’y gihimo nga “cleansing” kon pagpanangtang sa mga ngalan sa senior citizens nga patay na, kadtong kapin sa 2,000 nga wala mokolekta sa ilang cash assistance sa miaging Marso ug kadtong mga nadoble paglista ang mga ngalan.

Matud ni Llaguno nga apil nga gitangtang sa listahan mao kadtong tikasan nga senior citizen nga taga Mandaue apan nagpalista usab nga lumulopyo kuno siya sa Barangay Busay apan gigamit diay ang panimalay sa iyang igsoon nga sakop sa Lupon.

Si Mayor Michael Rama mitahas sa mga department head sa City Hall nga maoy magsilbi nga supervisors sa padayong pagpanghatag sa cash assistance sa mga senior citizens nga gipaagi sa mga disbursing officers.

Ang pagpanghatag didto gihimo sa lainlaing mga barangay, sagad sa mga barangay hall ug sa mga barangay sports complex.

Dunay mga tawo nga nagplano nga mokandidato sa nagsingabot eleksyon sa barangay nga mipahimulos sa higayon sama sa pagbutang sa mga dagku nila nga hulagway sa dapit nga gihimoan sa pagpanghatag sa cash assistance.

Kadtong mga seniors nga dili makakobra sa ilang cash assistance para sa south district makahimo gihapon pagkobra apan adto na sa City Hall og kinahanglang dili molapas sa 15 ka adlaw.

Kadtong mga dili makakobra sulod sa 15 ka adlaw nagpasabot nga pipila kanila dili g’yud mga lumulopyo dinhi sa dakbayan og tua sila sa lagyo nga dapit nagpuyo og giparehestro lang dinhi sa dakbayan sa ilang mga anak ug apo aron makadawat og hinabang-salapi. Matag usa ka senior dinhi sa dakbayan gigahinan og tag P10,000 nga cash assistance sa City Hall.