Abyon Paingon sa Bohol Gi-divert Pagtugpa sa MCIA

Gipahibawo sa kadagkuan sa Mactan Cebu International Airport (MCIA) nga usa ka eroplano gikan sa Manila ang gi-divert pagpatugpa sa Cebu tungod sa dautang panahon Martes ganinang buntag.

Si Gemma Imbong sa Operation Division sa MCIA mibutyag nga ang maong abyon mao ang Cebu Pacific flight 53647 nga may kapin sa 100 ka mga pasahero gikan sa Manila ug gikatakda untang motugpa sa Tagbilaran mga alas 9:40 ang takna sa buntag, Martes.

Apan gumikan sa kabaga sa dag-om, ulan ug hangin, gi-divert ang maong flight paingon sa Mactan Airport ug mitugpa kini mga alas 9:53 sa buntag.

Hinuon gipahibawo niini nga alas 11:00 sa buntag milupad na kini og lahos paingon sa Tagbilaran City.

Gawas niini, may duha usab ka mga abyon nga nadelatar sa paggikan sa MCIA tungod gihapon sa dili maayong panahon.

Kini mao ang ang international flight nga Cebu Pacific flight Cebu-Narita, Japan ug ang domestic flight nga Cebu Pacific Cebu – Bacolod flight nga gikatakda unta nga mogikan sa alas 8:00 sa buntag karong adlawa.

Samtang gipahibawo sa buhatan ni MCIA General Manager Nigel Paul Villarete nga ang Mactan airport gipaubos sa highten alert subay sa pagdagsa sa mga pasahero sa airport atol sa paghandum sa semana santa ilabina ugmang adlawa, Myerkules santo.

Sama sa gihimo sa kapolisan ug Philippine Coast Guard, ang tigpamaba sa MCIA nga si Mary Ann Dimabayao nitug-an nga nagbutang usab sila og information and help desk center sa departure ug arrival area sa domestic ug international terminals aron maatiman dayon ang mga problema sa mga pasahero.

Iyang gitataw nga gihugtan usab ang seguridad sa airport, ug taliwala sa pagdagsa sa daghang mga pasahero, ilang giawhag ang mga pasahero nga molarga nga angay sayo moabut sa airport duha hangtud sa tulo ka oras sa dili pa ang flight niini aron dili malangay sa biyahe.