ABC: Mga Kawaning Adik Taktakon

Ang presidente sa Association of Barangay Councils (ABC) nga si Tisa Barangay Captain Philipp Zafra misuporta sa awhag ni Mayor Michael Rama nga taktakon g’yud ang mga kawani sa barangay nga mamatud-an nga tigamitan og ilegal nga drugas.

Kini usab maoy awhag ni Zafra ngadto sa mga kauban niya nga kapitan sa 80 ka barangay nga sa dili pa sila modawat og mga bag-ong kawani pakuhaon nila og drugtest ang mga moaplay, ingon man ang karaan na nga mga kawani, mo-undergo og susama nga drugtest usa bag-ohon ang ilang kontrata.

Karong tuiga aduna na’y duha ka kawani sa Barangay Zapatera ang napositibo sa shabu diha nga gihimoan sila og random drugtest, apan sa miaging tuig kapin sa 100 ka kawani napositibo sa shabu, sagad niini mga tanod ug garbage loaders.

Si Mayor Rama miawhag sa mga kapitan, ilabi na kadto’ng iyang mga alyado sa Team Rama sama ni Tinago Barangay Kapitan Joel Garganera, nga dili mahinugon sa ilang mga kawani nga adik.

Upat ka kawani sa Barangay Tinago ang namatud-an nga tigamitan og gidili’ng drugas sa kinalit nga drugtest sa miagi’ng tuig apan wala sila taktaka sa trabaho sa kapitan.

Matud ni Mayor Rama nga ang mga kapitan sa barangay dili angay nga makig-uban pagtrabaho sa mga adik nga kawani kana kun sensiro sila sa kampanya batok sa gidili nga drugas.

Si Dr. Alice Utlang, pangulo sa City Office for Substance Abuse Prevention (COSAP), miingon nga subsob sila nga mopahigayon og random drugtest karong tuiga ug isugyot niya nga ang mga mapositibo taktakon gayud sa serbisyo.