99 Kawani Positibo sa Iligal nga Drugas

Miabot na og 99 ka kawani sa barangay dinhi sa dakbayan sa Sugbo ang nasakpan nga tiggamitan og gidili’ng matang sa drugas human ang pito ka empleyado sa Barangay Basak-San Nicolas napositibo sa gipahigayong drugtest niadtong buntag sa Byernes.

Si Kapitan George Rama sa Barangay Basak-San Nicolas mitug-an nga ang napositibo sa drugtest mao ang duha niya ka tanod, tulo ka garbage loaders ug ang duha mga kawani nga gidistino sa pagmintinar sa ilang mga kanal sa barangay.

Kun si Kapitan Rama ang pagbut-on, gusto niya nga taktakon dayon sa serbisyo ang mao nga mga kawani apan hatagan niya og higayon ang mga kauban niya sa konseho nga mohukom unsa’y ilang himuon sa mga kawani nga adik.

Matud ni Kapitan Rama nga si Dr. Alice Utlang, hepe sa City Office for Substance-Abuse Prevention (COSAP), mitug-an nga ang mao nga mga kawani nga napositibo sa paggamit og gidili nga matang sa drugas mahimo’ng ipalawom og out-patient rehabilitation. Paglabay sa pipila ka buwan, ang mao nga mga kawani himoan na usab og drugtest ug kun sila dili na positibo sa gidili nga mata’ng sa drugas mahimong hatagan sila’g higayon nga makapadayon pagserbisyo sa barangay.

Miabot na og 26 ka barangay ang nahimoan og kinalit nga drugtest alang sa mga opisyal ug kawani, ug aduna g’yuy mga kawani sa 21 ka barangay nga namatud-an nga mogamit og gidili nga matang sa drugas – sagad shabu.

Matud ni Dr. Utlang nga kaduha na lang sila mopahigayon og drugtest sa mga opisyal ug kawani sa barangay sulod sa usa ka semana kay aduna sila’y laing gimbuhaton nga mao ang paghimo og education drive aron ang katawhan ma-discourage paggamit og gidili’ng drugas.