9 Ka Kawani sa Brgy. Mogamit og Gidilin’g Drugas

Siyam na usab ka kawani sa barangay dinhi sa dakbayan sa Sugbo ang napamatud-an nga mogamit sa gidilin’g drugas.

Tulo ka tanod ug mga kawani sa Barangay Kamputhaw ang nasuta nga tiggamitan og gidili nga matang sa drugas dihang sila gipakalitan og drugtest niadtong Martes.

Si Dr. Alice Utlang nga maoy hepe sa City Office for Substance Abuse Prevention (COSAP) mibutyag nga kapin sa 90 ka kawani sa Barangay Kamputhaw ang gihimoan nila og drugtest.

Matud ni Utlang nga ang mga opisyal sa Barangay Kamputhaw ubos ni Kapitan Trifonio Liquigan maoy mihangyo sa COSAP nga pakalitan og drugtest ang ilang mga kawani.

Naandan nga ang COSAP dili mobutyag sa ngalan sa mga kawani nga mamatud-an nga positibo sa gidili nga drugas kay gilatid kini sa balaod.

Si Utlang miingon nga anaa ra sa mga opisyal sa hingtungdang barangay kun unsay himoon nila lakang batok sa ilang mga kawani nga mahibaw-an nga tiggamitan og gidili’ng drugas.

Nahibaw-an nga adunay mga kapitan nga gusto g’yud nga taktakon sa serbisyo ang mapositibo sa gidiling drugas samtang duna ‘say uban nga mohatag og higayon nga magbag-o ang maong mga kawani.

Matud ni Utlang nga adlaw-adlaw na sila nga mohimo og kalihukan nga pag-ila kinsa ang mga kawani sa barangay ug City Hall nga mogamit og gidili nga drugas.