70 Anyos nga Dinakpan, Gisuway Pagluwas sa Pamilya

Gidakop sa kapolisan ang usa ka hamtong na nga asawa ug duha niya ka anak lalaki kay sila’ng tulo nagtinabangay pagluwas unta sa iyang 70-anyos nga bana ug amahan nga nadakpan sa pagbaligya’g shabu.

Ang luwason unta sa tulo mao si Romeo Regner kinsa nadakpan sa mga sakop sa City Anti-Illegal Drug Special Operation Task Group human mibaligya og duha ka medium-sized nga shabu didto sa iyang balay sa Greenside, Barangay Hipodromo, kaniadtong Miyerkoles sa udto.

Giapil pagdakop sa kapolisan si Nerisma Regner nga asawa ni Romeo, ug ang mga anak niini nga sila si Ragme ug Winston.

Ang kapolisan mipahigayon og buy-bust operation didto sa balay ni Romeo human sila makadawat og impormasyon nga ang tiguwang namaligya og gidili nga drugas.

Gigamit sa kapolisan ang P2 mil nga “marked money” sa pagpalit nila og duha ka medium-sized nga pakete sa shabu. Dihang mitunol na ang tiguwang sa shabu ngadto sa poseur buyer, diha-diha kini nga gidakop.

Apan ang mga polis nakabantay nga daghang tawo nag-abot-abot sa mao nga dapit ug nabalaka sila nga adunay mo-rescue sa dinakpan mao nga ilang nahukman nga dad-on nila dayon si Romeo Regner sa Camp Sotero Cabahug.

Ang kapolisan nagkanayon nga pag-abot nila sa kampo didto na daan ang asawa sa dinakpan uban sa duha niini ka anak.

Matud sa kapolisan nga nagtinabangay paglunggob ang tulo sa dinakpang tiguwang kay gusto nila kini nga ilogon gikan sa mga midakop kaniya.

Tungod sa gihimo sa asawa sa dinakpan ug sa duha niya ka anak, giapil sila sa pagdakop ug gitanggong sa karsel sa Cebu City Police Office (CCPO) ug pasakaan sila’g kaso nga Obstruction of Justice.

Si Romeo Regner pasakaan usab og kaso kabahin sa pagbaligya ug paghupot og shabu nga kalapasan sa Sections 5 ug 11 sa Article 2 sa Comprehensive Dangerous Drugs Act.

Image Credit: www.eji.org