69 Kahayopan Nangamatay, Danyos Miabot na’g P22 Milyones

Miabot na og 69 ka lainlaing matang sa kahayopan sa kabukiran sa dakbayan sa Sugbo ang gikataho nga namatay tungod sa grabe nga kabugnaw sa panahon ug gibana-bana nga P22 milyones na ang kantidad sa mga tanom nga nadaut tungod sa subsob nga pag-uwan sa milabay’ng mga adlaw.

Ang report ni Cebu City Agriculturist Joelito Baclayon nagkanayon nga 63 na ka baka ang wala makahutay sa grabe nga katugnaw.

Nahibaw-an hinoon nga ang uban sa mao nga kahayopan gitiwasan na lang sa ilang mga tag-iya sa pag-ihaw kay dili na mokaon tungod kay nagluya gumikan sa kabugnaw.

Pagka karon, ilabi na panahon sa kabuntagon, ang kabukiran sa dakbayan sa Sugbo daw gihabolan sa baga kaayo nga mga gabon nga maoy naghatag og kabugnaw sa mao nga dapit.

Matud ni Baclayon nga ang 31 ka baka nga nangamatay o gipang-ihaw na lang sa ilang mga tag-iya nagagikan sa Barangay Lusaran, duha sa gikan sa Barangay Adlaon, 12 sa Barangay Tag-bao, 16 sa Barangay Sudlon II ug duha sa Sudlon 1.

Gawas sa 63 ka baka, may usa ka kabaw nga namatay ‘sab didto sa Barangay Adlaon, samtang may mga baboy, kanding ug usa ka karnero nga namatay ‘sab sa ubang kabarangayan.

Si Kapitan Lucresia Gabato sa Barangay Tabunan miingon nga sagad sa mga baka nga nangamatay mao kadtong walay mga payag-payag nga pahuwayanan.

Matud ni Gabato nga ubay-ubay siya og mga binuhing baka ug walay bisan usa kanila nga namatay tungod kay aduna siya’y inaptan nga payag nga tua niya kini ipahimutang.

Si Baclayon misugyot nga hatagan ang mga mag-uuma og similya sa ilang mga tanom. Ang mao nga mga similya mokantidad usab og P2.2 milyones.

Matud ni Konsehal Dave Tumulak nga iyang himoan og resolusyon nga ang mao nga kantidad adto ibanon sa Calamity Budget sa dakbayan.