‘40% Ang Grado ni Rama’

Si Mayor Michael Rama gihatagan lang og grado nga 40 porsyento ni kanhi Kongresista Tomas R. Osmeña kabahin sa pagdumala niya sa panalapi sa dakbayan sa Sugbo.

Kini tungod kay matud ni Osmeña nga basi sa dukomento nga nakuha niya gikan sa City Treasurer’s Office ang kinatibuk-ang kwarta sa dakbayan kaniadtong Hunyo 30 miabut lang og usa ka bilyon ka pesos.

Matud ni Osmeña nga kon pamayran sa administrasyon ni Rama ang tanan niini nga obligasyon ngadto sa mga suppliers ug sa uban pa niya nga mga bayranan, mahurot na ang salapi sa panudlanan.

Si Osmeña mitataw nga sa pagbiya niya pagka mayor kaniadtong Hunyo 30, 2010, ang dakbayan sa Sugbo adunay kinatibuk-ang salapi nga nagkantidad og kapin sa P2.2 Bilyones.

Dugang pagpasabot ni Osmeña nga daku gihapon kaayo ang kantidad nga iyang gibilin bisan og gibayran niya og advance ang bayranan ngadto sa Japan kabahin sa huwam sa pagtugot og South Reclamation Project.

Matud ni Osmeña kay karon ang dakbayan sa Sugbo duna ra may kinatibuk-an nga usa ka bilyon ka pesos kaniadtong Hunyo 28, ug daghan pa nga mga bayranan, si Osmeña miingon nga tukma lang nga gradohan ra niya si Rama og 40 porsyento.

Si Osmeña miingon nga makauuwaw kaayo kang Rama nga maglisud gani pagbayad sa mga supplier sa City Hall ug dili usab dayon makahatag sa cash incentive sa mga senior citizens.