4 ka Outstanding Bol-anon, Gipasidunggan Atol sa Bohol Day

(PIA-Bohol) – Gipasidunggan sa lalawigan sa Bohol sa pagpanguna ni Gob. Edgar Chatto ang upat ka outstanding Bol-anon atol sa selebrasyon sa ika-161 nga anibersaryo sa Bohol kagahapon nga gipahigayon sa Bohol Cultural Center.

Gitawag nga Governor’s Award, kining espesyal nga pasidunggog gitahag sa mga Bol-anon nga nakulit na sa ilang pangalan sa nagkalain-laing natad sa ilang paninguha matag selebrasyon sa Bohol Day matag tuig.

Alang sa business enterprise, gipasidunggan si Victoria Wallace-Sandidge, kinsa mi-alagad isip nurse sa New York apan nipaule sa Bohol aron pagsunod sa iyang pasyon sa pag-uma ug nipalit sa 4.5 ektaryang kabtangan nga iyang gi-ugmad ngadto sa gi-ila na karong Bohol Bee Farm.

Sa natad sa Social Service, gipasidunggan si Mateo Quilas, ang nagmugna ug aktibong nagdala sa usa sa pinaka-aktibong sektor sa mga adunay kabilinggan sa panglawas.

Gihikawan sa gasa sa kahayag apan si Quilas maoy Presidente sa lig-ong Bohol Federation of Disabled Persons, diin nakadawat usab siya sa pasidungog isip 2005 Disable Filipino of the Year Award kauban sa ubang Apolinario Mabini Awardees. Siya usab ang nangulo sa pagkab-ot sa Gawad Eugenio Lopez Bayaning Filipino Awards niadtong tuig 2014.

Sa larangan sa public transport, ilabi na sa shipping, gihatag ang Governor’s Award kang Lucio Enerio Lim, ang tag-iya ug tigdumala sa Lite Shipping nga nahimo na karong iconic symbols sa cargo ug passenger shipping services sa Bohol.

Sa larangan sa paugnat sa kusog sa natad sa boxing, ang Bol-anon nga taga Basdio Guindulman nga si Teogenes Peligrino ang nakadawat sa Governor’s Award.

Si Peligrino usa ka Boholano Olympian nga nakasakmit sa silver sa 1967 ASEAN Games sa Colombo Sri Lanka ug nag-inusarang winner sa 5 man Philippine boxing team sa 1968 Mexico Olympics.

Samtang gipasidunggan usab sa Governor’s Award, in a special citation ang kanhi DILG Bohol Provincial Director nga tua na karon sa Rehiyon 12.

Si Ananias Villacorta nakatampo og daku sa pagbangon sa lalawigan sa Bohol sa mga kadaot nga gibilin sa linog niadtong Oktubre 2013. (PIA-Bohol/ecb)