29th Overseas Job Fair On May 1

Aron sa paghatag ug kahigayonan sa mga katawhang Sugbuanon nga nangita ug trabaho, ipahigayon sa kagamhanan ning dakbayan nga gipangulohan ni Mayor Michael Lopez Rama pinaagi sa Department of Manpower Development and Placement kon DMDP ang 29th Overseas Job Fair karong Mayo 1, 2016 adlawng Domingo ngadto sa Cebu City Sports Center.

Gipahigayon ang Overseas Job Fair sa Dakbayan matag Mayo 1 matag tuig subay usab sa pagsaulog sa Labor Day kon Adlaw sa mga Trabahante kon Mamumuo.

Samtang giila usab nga ‘Father of Cebu City Jobs Fair’ si Mayor Rama kinsa misugod sa pagpahigayon sa maong mapuslanong kalihokan niadtong Konsehal pa kini.

Daghan nang mga katawhan ang natabangan nga nakatrabaho pinaagi sa Local ug Overseas Jobs Fair sa kagamhanan ning dakbayan.

Ang kalihokan nga magsugod sa alas-8 sa buntag ug molungtad hangtod sa alas-5 sa hapon salmotan sa nagkadaiyang mga ahensiya ug kompanya nga adunay permiso gikan sa Philippine Overseas Employment Administration kon POEA.

Giawhag ang tanang mga aplikante sa pag-andam ug pagdala sa ilang mga resume, biodata, o curriculum vitae nga adunay picture; Transcript of record alang sa College graduate; High School Diploma alang sa High School graduate; ug Employment Certification alang sa mga nakatrabaho na sauna (optional) lakip na ang passport kung anaa.

Dugang pa, alang usab sa dugang nga kasayuran mamahimong mobisita sa buhatan sa DMDP nga anaa sa 2nd Floor sa Ramos Public Market Building, sa dalan F. Ramos ning syudad o mamahimong motawag sa Telephone Numbers 253–9212 ug 254–4348. Abli ang kalihokan alang sa tanang aplikante. (Cebu City Public Information Office PIO/Greggy Jiggs P. Senados)