292 HOTS On Mega Job Fair

Mikabat ug 292 ang nadawat o na-hired-on-the-spot kon HOTS atol sa gipahigayon nga 73 Mega Local Job Fair sa kagamhanan ning dakbayan niadtong Abril 2, 2016 adlawng Sabado didto sa Cebu City Sports Center.

Gikan sa 1,382 ka mga aplikante, 292 ang nadawat diha-diha dayon samtang ang uban ipalawom pa sa final nga interbiyo ug pagkuha sa ubang mga rekisitos sa pagpanarbaho.

Sa pakighinabi sa BARUGG News gibutyag ni Realdin Sarona, 20, gikan sa Barangay Bulacao ning syudad kinsa nadawat sa SM Supplies sa MS Seaside City nga, “Dako gyod akong pasalamat sa Ginoo nga gihatag ni nga opportunity ug nakasulod ko ug trabaho bisan fresh graduate pa ko.”

Dugang gipasabot ni Sarona nga maayo ang gibuhat ni Mayor Rama nga adunay Job Fair ang Cebu City Government kay daghan ang nangita ug trabaho karon.

Alang kang Harold King Gebe, 20, taga Barangay Lahug ning syudad kinsa nadawat sa Sports central gipasabot niini nga, “Dako gyod tabang ang Cebu City Job Fair kay pareha karon daghan fresh graduates daghan ang gusto makatrabaho. Thankful kaayo ko nga nadawat ko.”

Samtang alang sa mag-amega ug silingan nga silang April Jane Nebreja, 19 ug Charie Juntilla, 25 lumad nga taga Biasong, Talisay City kinsa nadawat nga Sales Clerk ug Checker sa SM Seaside City Cebu gipadayag nila nga, “Nagpasalamat gyod mi ni Mayor Rama nga gihatagan mi ug chance nga makaapil sa Job Fair dako ni ug tabang para maka-help mi sa among Family.”

Ang kalihokan gipahigayon sa kagamhanan ning dakbayan pinaagi sa Department of Manpower Development and Placement kon DMDP inabagan usab sa Department of Labor and Employment kon DOLE ug sa 61 ka mga kompanya ug ahensiya nga nagtanyag ug 4,391 ka mga bakanting trabaho.

Nanghinaot usab si DOLE Region 7 Assistant Regional Director Joel M. Gonzales nga unta mamahimong lamdag ug paglaum ang Cebu City 73rd Mega Local Job Fair ngadto sa mga job applicants aron sila makabaton ug maayong trabaho ug maayong kaugmaon.

Matod usab ni Engr. Ma. Suzanne Ardosa, hepe sa DMDP nga ang Cebu City Job Fair kabahin sa tinguha ni Mayor Rama nga mapaduol ang serbsisyo sa Cebu City Hall ngadto sa katawhan subay sa tinguha niini nga mo-arang-arang ang kahimtanag sa mga Sugbuanon.

Giasoy ni Ardosa nga, “It is the thrust of the Rama administration to make the services of the city available right at your doorstep, to make the lives of the poor better, the middle class comfortable and the rich not to control.”

Dugang pa, ang kalihokan gitambungan usab sa mga kawani gikan sa Office of the City Civil Registrar, Philippine Health Insurance Corporation, National Bureau of Investigation, ug Social Security System nga mitanyag usab sa ilang serbisyo ngadto sa mga aplikante. Gipaluyohan usab kini sa nagkadaiyang mga media partners ug nahuman hangtod na nga naserbisyohan ang tanang misalmot niini. ( Cebu City Public Information OfficePIO/Greggy Jiggs P. Senados)