28 ka Tao Nataptan sa HIV ug AIDS ning Tuiga

Mikabat na sa 28 ka tawo ang nataptan sa sakit nga Human Immunodeficiency Virus (HIV) ug Acquired Immune Deficiency Syndrome (AIDS) dinhi sa Cebu gikan Enero hangtud Hulyo niining tuiga, sumala pa ni Dr. Rene Joseph Bullezer, hepe sa AIDS Free Philippines.

Gisaysay ni Bullecer kagahapon sa buntag nga sa miaging Agusto 4, ning tuiga iyang gitataw nga ang labing ulahing nataptan og sakit nga AIDS mao ang usa ka call center agent.

Matud pa ni Bullezer nga nagsaka ang gidaghanon sa mga tawo nga natakboyan sa maong sakit.

Iyang gibutyag nga sukad sa pagtukod sa ilang buhatan niadtong tuig 1995 hangtud karon mitala na sila og 1,354 ka mga kaso sa HIV ug AIDS, dinhi sa Cebu.

Midugang siya nga niining maong gidaghanon, 760 ang nataptan sa HIV, samtang 392 usab ang nataptan og AIDS ,ug ang 360 niini namatay na.

Mikabat usab og 897 ang mga lalaki nga nataptan sa maong sakit samtang 485 ang mga babae, nga nagpangidaron og 15 ngadto sa 59 anyos.

Nagkanayon si Bullezer nga nakapasamot sa maong sakit ang sayop nga kampanya sa gobyerno bahin sa paggamit og contraceptives sama sa condom aron makalikay sa sakit nga HIV ug AIDS.

Wala hinuon ikapasabot ni Bullecer nganong sayop kining kampanyaha basta ang nasayran sa katawhan nga ang paggamit sa condom maoy paglikay nga makaporma og bata ilawom sa tiyan sa babaye ang sperm cell sa lalaki sa ilang pakighilawas.

Busa nanawagan si Bullezer sa katawhan nga likayan ang wala pay kaayohan nga sakit pinaagi sa dili sa pagsagad sa pagpakighilawas ni kinsa mang lalaki ug babaye nga wala ninyo masinati.