21M Estudyante Motungha sa Lunes

Gipaabot sa Department of Education (DepEd) ang pagdagsa sa halos 21 milyones nga estudyante gikan sa mga pampublikong tunghaan sa tibuok nasud karong Lunes, Hunyo 2.

Sigun sa talaan sa DepEd, mokabat sa 2 milyones ang kindergarten, kapin 13 milyones ang sa elementarya ug halos 6 milyones ang estudyante sa sekondarya nga motungha sa mga eskwelahan.

Nakadawat og P337 bilyones nga pundo ang DepEd diin kapin sa P37 bilyones niini ang gigahin sa pagpatukod og mga lawak-tunghaan.

Samtang, gitakdang manawat usab ang DepEd og 33,000 ka magtutudlo karong tuiga.

Adunay 201 ka adlaw sa klase karong tuiga gikan Hunyo 2, 2014 hangtud Marso 27, 2015.