178 Ka Kawani Positibo sa Illegal nga Drugas

Miabot na g’yud og 178 ka kawani gikan sa 54 ka barangay dinhi sa dakbayan sa Sugbo ang namatud-an nga tiggamitan og gidili nga matang sa drugas human sila mapositibo sa gipahigayong drug test.

Ang labing ulahi nga napositibo sa drug test nga gihimo sa mga sakop sa Cebu City Office for Substance Abuse Prevention (COSAP) mao ang duha ka kawani sa Barangay Cogon-Ramos ug laing usa sa Barangay Sapangdaku.

Ang hepe sa COSAP nga si Dr. Alice Utlang mibutyag nga driver ug garbage loader ang napositibo sa drug test sa Barangay Cogon-Ramos samtang garbage loader ‘sab ang napositibo sa gipahigayon nga drug test didto sa Sapangdaku kaniadtong Biyernes.

Didto sa Barangay Toong, bukid ni nga barangay sa dakbayan sa Sugbo, walay bisan usa sa napositibo sa drug test nga gipahigayon sa COSAP kaniadtong Miyerkoles.

Matud ni Utlang nga si Kapitan Omar Durano sa Barangay Cogon-Ramos ug Kapitan Lorna Damalerio sa Barangay Sapangdaku maoy miawhag og drugtest sa tagsa-tagsa nila ka barangay sa miaging Biyernes.

Gipasabot hinuon ni Utlang nga anaa ra sa duha ka kapitan kun unsay himuon sa mga kawani nila nga napositibo sa gidili nga drugas atol sa drugtest.

Gisugyot hinuon ni Utlang nga kadto’ng mga tanod nga mapositibo sa drugtest angayan gayud nga taktakon sa serbisyo kay salikwaot kaayo nga sila gitugyanan pagpanakop sa mga malapason sa balaod apan utro pa sila nga dakponon.