16,000 ‘Face Mask’ Gidonar Alang sa mga Basurero, Traffic Enforcers

Usa ka kompanya nalooy sa mga basurero ug mga traffic enforcers sa dakbayan sa Sugbo nga kanunay lang maghanggap sa baho gikan sa mga basura, abog sa karsada ug aso gikan sa mga sakyanan.

Si Ma. Emma Ramas, presidente sa Destiny Medical Fund Inc., midonar og 16,000 ka mahalong matang sa mask nga magamit sa mga basurero nga dili na sila direkta nga makahanggap sa mga basura.

Natan-aw usab ni Ramas nga ang mga traffic enforcers angay g’yud unta nga mag-mask kun anaa sila sa karsada aron dili sila kanunay nga makahanggap og aso gikan sa tambotso sa mga sakyanan.

Apan dunay mga traffic enforcers nga hasolan nga mogamit og mask nga magtabon sa ilang ilong ug baba tungod kay hasol na kaayo kun kinahanglan sila nga mogamit sa ilang pito kon sirbato.

Ang kantidad sa matag mask mikabat og P105. Si Mayor Michael Rama mapasalamaton kaayo ni Ramas sa pagdonar sa mao nga mga mask nga kapahimuslan kaayo sa mga kawani sa Department of Public Services ug sa City Traffic Operations Management.

Si City Administrator Lucelle Mercado mihatag og kamandoan ngadto ni Engr. Dionesio Gualiza, ang hepe sa General Service Office sa City Hall nga ang tanang donasyon alang sa dakbayan sa Sugbo ipaagi gayud sa GSO.

Tumong ni Mercado nga ma-rekord g’yud sa GSO ang tanang mga butang nga gidonar alang sa dakbayan.

Gibutyag ni Gualiza nga adunay ubang mga donasyon alang sa dakbayan sa Sugbo sa nangaging panahon nga wala ma-rekord sa GSO mao nga dunay posibilidad nga dili na kini makita.