16 ka Pamilya sa Warwick-Baracks Mikiha sa Mayor

Si Mayor Michael Rama ug ang pipila ka opisyal sa dakbayan sa Sugbo gipasakaan og kaso didto sa hukmanan sa 16 ka nasunogan sa Warwick-Barracks sa Barangay Ermita.

Gawas sa mayor, giapil usab pagkiha si Raquel Arce, ang hepe sa City Hall Clearing Team nga maoy mikoral ug mihawan sa nasunogan nga gipuy-an sa mga mipasaka og kaso didto sa korte Huwebes kagahapon.

Ang mga mipasaka og kaso mao sila si Buenaventura Cantiveros, Juana Monceda, Antonio Cantano, Maximo Andales, Severina Gaco, Corazon Balaba, Loreta Gesto, Teresita Remonida, Gina Conte, Andrew Mercardo, Sergio Andales, Cerelina Tudtud, Milagros Mabandos, Marife Enal, Pilar Enal ug Emilia Borres.

Ang abogado sa mga kihante nga si Marven Pañares miawhag sa hukmanan nga moisyu unta og Temporary Restraining Order (TRO) aron tugotan sila nga makabalik pagpuyo sa kanhi nila gipuy-an.

Ang argumento sa mao nga mga pamilya nga ang yuta nga nahimutangan sa Warwick Barracks market dili iya sa dakbayan kay gipanag-iya kini sa nasudnong kagamhanan.

Apan ang mga opisyal sa City Hall miingon nga duna sila’y dokumento nga ang mao nga yuta gitugyan na sa nasudnong kagamhanan ngadto sa dakbayan sa Sugbo.