14 Kapamilya sa Tent City Nagpabilin sa Cebu

Gitug-an sa Department of Social Welfare and Development (DSWD-7) nga sa 54 ka mga pamilya nga nahimong evacuees sa tent city sa South Road Properties (SRP) sa syudad sa Sugbo, 14 niini ang nagpabilin ug nagpuyo na dinhi sa Sugbo.

Apan giklaro sa Disaster Risk Reduction and Management Focal Person sa DSWD-7 nga si Jenny Abastillas nga wala nay tulubagon ang gobyerno sa naasoy nga mga pamilya sanglit nakatrabaho na sila.

Gipahibawo ni Abastillas nga ang maong mga kanhi evacuees nagpuyo sa mga kabalayan sa ilang paryente samtang ang uban nangabang og balay.

Gitug-an usab niini nga sagad sa naasoy nga pamilya nagtrabaho sa call centers sanglit may mga membro kini nga mga professionals.

Sa pagkakaron, ang DSWD nagtutok sa pagtabang sa mga biktima sa bagyong Yolanda didto sa amihanang bahin sa lalawigan sa Sugbo ug sa ubang lugar sa Central Visayas nga apektado usab sa pagkusokuso sa maong bagyo.

Image Credit: cebudailynews.inquirer.net