12 Porsyento’ng Umento sa Tubig, Gikabalak-an

Gikabalak-an nga mosamot kadaghan ang mga konsumidor og tubig sa Metro Cebu Water District (MCWD) nga maputlan unya sa ilang koneksyon kay dili dayon makabayad kun ipatuman g’yud ang 12 porsiento nga pagpaumento sa bayranan.

Kini maoy gipadayag sa pipila sa 10 ka tawo nga gitugotan nga makasulti sa ilang baruganan kabahin sa gipangayo nga umento sa MCWD nga gitun-an pa karon sa Local Water Utilities Administration (LWUA) didto sa kaulohan.

Ang Cebu City Council igo lang mipahigayon og public hearing nga gipatambong nila ang kadagkoan sa MCWD aron ilang mapaminaw ang mga sentimento sa katawhan kabahin sa gidemanda nga water rate increase.

Pagka karon, P136 lang ang mabayran sa usa ka konsumidor sa MCWD kun ang iyang magamit nga tubig dili molapas sa napulo ka metro-kubiko nga tubig apan gisugyot nga himoon na kini nga P152.

Ang usa ka metro-kubiko nga tubig katumbas kini sa lima ka baril kun 50 ka plastic containers. Sa laktod, 1,000 ka litro nga tubig.

Ang lagda sa MCWD nga kun magkadaghan ang konsumo nga tubig sa usa ka kunsomidor, mas modaku ang iyang baryanan kay magkamahal man ang bayad.

Ang MCWD mopausbaw sa ilang bayranan kay aduna sila’y P7 bilyones nga expansion project, apil niini ang pagkuha og duga’ng suplay sa tubig gikan sa sapa sa Barangay Luyang, Carmen.

Usa ka private contractor maoy mopasuyop sa mao nga tubig gikan sa sapa og dad-on kini sa lungsod sa Compostela subay sa mga dagko nga tubo aron ikonektar sa mga linya sa MCWD.

Bisan sapa ang kuhaan unya sa tubig sa private contractor sa MCWD, apan si MCWD assistant general manager for operations Ernie Delco miingon nga limpyo na imnon ang tubig.

Ang tubig nga isuplay sa private contractor nga adto kuhaon sa sapa sa Carmen og dad-on sa Compostela paliton sa MCWD sa kantidad nga P24.59 matag metro kubiko.

Apan gitataw ni Delco nga ang suplay nga tubig nga makuha gikan sa Luyang River dili kini makaabot dinhi sa dakbayan sa Sugbo kay igo ra kini masuplay sa mga konsumidor sa Compostela, Liloan, Consolacion, Mandaue ug Lapu-Lapu.

Gipasabot ni Delco nga makiangayon lang nga umentohan na ang presyo sa tubig nga gibaligya sa MCWD kay walo ka tuig na nga wala sila mopatuman og increase, dili sama sa ubang public utility company nga makadaghan na mopausbaw sa ilang bayranan.