12 ka Barangay sa Argao, Napunduhan sa Kalahi-CIDSS

Malampusong gipahigayon sa Lungsod sa Argao ang Municipal Inter-Barangay Forum Participatory Resource Allocation (MIBF-PRA). Nitungha ug nipadayag ang mga representante sa 45 ka barangay sa ilang mga proposed sub-projects alang sa ilang tagsa-tagsa ka barangay.

Ang MIBF-PRA usa ka Proseso sa Kapit BIsig-Laban sa Kahirapan, Comprehensive and Integrated Delivery of Social Services (Kalahi-CIDSS) sa Department of Social Welfare and Development (DSWD) diin gihatagan ug gahum ang ordinaryong tawo sa pag pili sa kinsa ang mas angay nga mahatagan sa pundo aron matubag ang panginahanglanon sa usa ka barangay. Layon sa maong program ang paghatag ug gahum sa katawhan sa pag desisyon ug pag ila sa mga nakitang problema sa barangay.

Sagad sa mga sub-projects nga gi propose mao ang pag tarong sa Barangay access roads. Usa na niini ang Barangay Talaga. Emosyonal kaayu si Ma. Victoria Lecias, Chariperson sa Project Prepration Team sa Talaga nga mipahayag sa ilang pangandoy nga botaran sa ubang barangay ang proyekto nga ilang proyekto nga gi propose. “Nia intawn ko maski na hospital pa ang akong anak, para lang gyud moshare ko diri sa atubangan. Nanghinaot gyud intawn ko nga mapili karon kay lisod gyud intawn among karsada, ako gyud ang unang makadungog ug mapangayuan ug tabang labi nag nay madisgrasya.”

Dugang pa ni Victoria nga usa pud siya sa nadisgrasya sa maong dalan, kay tungod sa ka tirik niini, gani atol sa site validation, wala na makalahos ang nag validate kay tungod sa kalisod sa dalan.

Nalipay si Victoria kay usa gyud sa napili ang ilang barangay. Sa resulta sa MIBF-PRA 12 ka barangay ang mag bahin sa 20 milyones nga pundo gikan sa World bank pinaagi sa Kalahi-CIDSS. Sa 12 ka proyekto, 9 niini ang pagsemento sa dalan sa Barangay Cansuje, Usmad, Tulang, Tiguib, Balaas, Talaga, Mabasa, Apo ug Jomgao. Drainage system ang Barangay Poblacion. Barangay Health Center ang sa Barangay Gutlang ug Water system usab ang sa Barangay Binlod.