1-Peso ASEAN Commemorative Coin, Gipagawas Na sa Bangko Sentral ng Pilipinas

Ang Bangko Sentral ng Pilipinas (BSP) nipahibalo nga ila nang gipatuyok karon ang 1-peso Association of Southeast Asian Nations (ASEAN) 2017 commemorative coin o sensilyo.

Ang maong commemorative coin opisyal nga gibuksan ni Presidente Rodrigo Duterte ug BSP Governor Amando Tetangco, Jr. atol sa paglusad sa Philippines’ ASEAN 2017 Chairmanship niadtong Enero 15, 2017 sa syudad sa Davao.

Ang pagpagawas sa maong P1.00 ASEAN commemorative coin nagtinguha sa pagdasig ug pagpakatap sa halapad nga kaamgohan ug interes sa ASEAN Chairmanship 2017 sa Pilipinas ug kooperasyon sa ASEAN. Matud pa sa BSP nga legal tender ang maong commemorative coin.

Ang atubangan sa maong sensilyo adunay panagway sa elemento sa ASEAN 50 Philippines 2017 logo nga adunay temang “Partnering for Change, Engaging the World.”

Ang ubang marka naglakip sa 10 ka bituon nga nag-representar sa ASEAN Members States, ang Member States nga gi-ukit og micro-text, adunay adlaw ug kalapati sa kalinaw ug ang BSP Mink Mark sa Baybayin.

Samtang sa luyong bahin sa maong sensilyo makita ang bantayog ni Jose Rizal nga may marka sa selyo sa BSP, “ASEAN 2017,” “REPUBLIKA NG PILIPINAS,” Denomination 1-Piso, ug listahan sa ASEAN member States. (ecb/PIA7-Bohol)